Gin-athag sang Philippine National Police (PNP) nga indi politically-motivated ang mga kaso nga ginapasaka batok kay Vice President Sara Duterte kag sa iya mga security personnel.
Suno kay PNP chief General Rommel Francisco Marbil, kabahin sang constitutional mandate sang PNP nga ipatuman ang layi sang patas ukon wala sang pag-apin bisan ano pa ang status kag political affiliation sang isa ka tawo.
Pahayag pa sini, kun indi maghulag ang mga pulis, madula ang salig sang publiko sa ila pag-abot sa law enforcement. Posible suno kay Marbil nga magawangal ang mga tawo nga mga pigado lang ang ginasilutan. Posible man suno sa iya nga may maghambal nga nahadlok ang mga pulis sa pagpatuman sang layi sa iban nga mga indibidwal.
“The PNP remains committed to its mandate to enforce the law without fear or favor. The filing of cases against any individual, regardless of status or political affiliation, is a reflection of our duty to the Constitution and the Filipino people,” kabahin sang statement ni Marbil.
Ginpaathag man sini nga may natun-an na sila sa nagliligad nga mga kontrobersiya nga ginkaulamiran sang mga pulis kaangay sang “tokhang” campaign kun sa diin gin-akusaran ang law enforcement nga naga-target lamang sang marginalized communities.
Ginpasalig man sini nga mangin patas sila kag sundon gid ang due process.
Matandaan nga mga kaso nga grave coercion, disobedience to persons in authority kag direct assault ang gin-file sang PNP batok kay Duterte, iya security head nga si Col. Raymond Lachica kag pila ka iban pa.
Kasunod ini sang insidente kadungan sang pagsaylo sang Office of the Vice President chief of staff nga si Atty. Zuleika Lopez halin sa House of Representatives pakadto sa Veterans Memorial Medical Center sang nagligad nga Nobyembre 23.
