LEON, ILOILO – Patay ang duha ka menor de edad kag 16 naman ang pilason matapos natumba ang jeep sa Barangay Cagay, Leon, Iloilo.
Ang mga patay amo ang mag-tiyo nga naga-edad sang 14 kag anom ka tuig.
Ang driver naman amo si Yuben Cabansag, 41, residente sang nasambit nga lugar.
Sa interview sang Bombo Radyo kay Police Captain John Predic Padilla, hepe sang Leon Municipal Police Station, iya ginpahayag nga 30 tanan ka mga pasahero ang sakay sang jeep sa diin 12 sa mga ini ang wala sang anuman nga pilas.
Suno kay Padilla, napatay ang makina sang jeep samtang nagapataklad sa alagyan.
Matapos sini, nagdalusdos padalom ang jeep, nahulog sa banglid kag nagbulid-bulid sang makaduha ka beses.
Sa subong, nagapabilin pa sa ospital ang mga pilason nga mga pasahero.
Preso naman ang driver sa Leon Municipal Police Station kag possible magpangatubang sang kaso nga two counts sang reckless imprudence resulting to homicide kag reckless imprudence resulting to multiple physical injuries.
