Ginpabugal sang Philippine National Police ang ila accomplishment sa drugs operations sa bug-os nga Western Visayas.
Sa exclusive interview sang Bombo Radyo Iloilo kay Pol. Lt. Col Joem Malong, tagpamaba sang Police Regional Office 6, iya ginpahayag nga nagdangat sa P23 million ang balor sang iligal nga droga nga ila natipon humalin sang nagpungko sa pwesto si PBGen. Rene Pamuspusan sa pwesto sang Hunyo.
Suno kay Malong, indi madali nga mapapas ang iligal nga droga sa Western Visayas bangud tuman kadako sang kwarta nga maganar sang mga nagaduso sini.
Apang suno kay Malong, wala sila naga untat sa pagpangdakop sa mga durugista.
Gin ako man ni Malong nga sa subong, naghagan hagan na ang baligya-anay sang iligal nga droga bangud man sa sige-sige nga operasyon sang mga otoridad.
Ginpahayag man ni Malong nga indi na shabulized ang Iloilo City apang indi man ini gilayon nga mabawi bangud si Presidente Rodrigo Duterte ang naghatag sang sini nga bansag.
