ILOILO CITY- Ginpaidalom sa insakto nga proseso ang mga Good Conduct Time Allowance Law beneficiaries, nga boluntaryo nagsungka sa kapulisan.
Sa interview sang Bombo Radyo kay Police Regional Office 6 Director, Police Brigadier Gen. Rene Pamuspusan, iya ginpahayag nga ginpaidalom na sa medical examinations kag iban pa nga proseso ang mga convicts.
Suno kay Pamuspusan tubtob sini nga adlaw ang plaso nga ginhatag ni Presidente Rodrigo Duterte sa iban pa nga mga preso nga wala pa nakasungka.
Kun may yara naman suno sa iya nga magsungka pagkatapos sang plaso, pagabatunon man nila ini sa gihapon kag sundon ang nagakaigo nga proseso.
Ang Bureau of Corrections suno sa iya ang bahala nga magdetermina kun bala ang iban nga nagsungka ang parole ukon GCTA benificiaries.
Ginpasiguro man ni Pamuspusan nga indi matechnical ang mga kapulisan sa pagpangdakop sa mga convicts bangud suno sa iya, ginbawi na ang pag-avail sang mga preso sang GCTA.
Pagasundon naman suno kay Pamuspusan ang insakto nga proseso sa pag-aresto sa mga convicts.
Dugang pa sang natungdan nga ang bounty ang indi magkadto sa mga kapulisan kundi mismo sa mga informants, kag siya ang nagapati nga may pagsulundan na ang Bureau of Corrections sa paghatag sang bounty.
Nahibaluan nga subong na nga adlaw magatapos ang 15 day grace period nga ginhatag sang Presidente kag bwas nga adlaw pagadal-on na sa Sablayan Prison and Penal farm ang 44 ka mga nagsungka sa kapulisan.
