ILOILO CITY – Ginkumpirma sang kapulisan ang pag-recruit sang isa ka grupo sa banwa sang Lemery, Iloilo agud ipadala sa Mindanao.
Ginpahayag ni Senior Inspector Elmer Villaruel, hepe sang Lemery Police Station, ang grupo ang nagapakilala nga Asian Anti-Communist League of the Philippines.
Ang pinuno sini amo si Boy Dao-ang sang Barangay Bangkal, Lemery, Iloilo.
Suno kay Villaruel, ang ma-recruit sang grupo ang ginapangakuan sang P30,000 nga suweldo kada bulan kag antis ipadala sa Mindanao, ginapangakuan ang mga ini nga binlan ang ila pamilya sang P40,000.
Magluwas diri, ginapangakuan pa ang mga ini nga hatagan sang armas.
Kapin 20 na ang una nga nakalakat sa Mindanao apang may pila nga nagbalik bangud nga wala matuman ang pangako nga kwarta.
Gin-athag naman ni Villaruel nga indi kabahin sang Maute ukon Abu Sayyaf group ang grupo kag wala ang mga ini makalab-ot sa Marawi.
Sa Polomolok, South Cotabato lamang ang mga ini ginadala agud mag-training apang wala man ginhatagan sang armas.
Magluwas sa Lemery, nagapang-recruit man ang grupo sa San Rafael, Barotac Viejo kag banwa sang Dumarao sa Capiz.