Hugot nga nagapahanumdom ang Philippine National Police (PNP) sa Western Visayas nga magbakal lamang sang mga lehitimo nga palupok sa mga tindahan nga may permit bilang preparasyon sa pagsumalang sang bag-ong tuig.
Sa interview sang Bombo Radyo kay Police Lt. Col. Arnel Solis, spokesperson sang Police Regional Office 6, ginsiling sini nga indi magbakal sa mga tindahan nga wala sang authorized permit nga nakapaskil sa ila agud malikawan ang disgrasya.
Suno kay Solis, daku nga pagpanghangkat sa ila ang paglapta sang iligal nga baligya sang palupok, ilabi na gid sa online platforms.
Ginpahayag niya nga nagmandu siya sa Civil Security Group Anti-Cybercrime Group nga lagson ang mga online seller sang iligal nga palupok agud malikawan ang posible nga disgrasya sa publiko.
Ginpahanumdom man ni Solis nga siguruhon nga may Philippine Standard (PS) Mark ang mga palupok nga baklon, nga nagapakita nga nag-agi ini sa husto nga proseso kag may kaangay nga permit gikan sa lokal nga panguluhan.
