ILOILO CITY- Magapabilin sa palibot sang compound sang Kingdom of Jesus Christ (KJC) sa Buhangin District, Davao City ang pwersa sang kapulisan nga nagapangita kay Pastor Apollo Quiboloy agud serbehan ini sang warrant of arrest.
Ini ang deklarasyon ni Brig. Gen. Nicolas Torre III, Davao regional police chief, matapsos nag-isyu ang Davao Regional Trial Court Branch 15 paagi kay Presiding Judge Mario Duaves sang Temporary Protection Order (TPO) batok sa police forces.
Sa amo nga Temporary Protection Order, ginmando ni Duaves sa police nga kakson ang tanan nga barikada, barriers ukon blockades nga nagapugong sa access sa KOJC compound para sa mga members kag officers sang religious group.
Ang Temporary Protection Order nag-ugat sa July 1 petition para sa writ of amparo nga gin-file sang KOJC kag Jose Maria College Foundation, Inc. nga naga-operate sang eskwelahan sa sulod sang compound.
Kahapon, hilway nga makagwa -sulod ang mga members sang KOJC apang sa idalom sang hugot nga pagbantay sang civil disobedience management forces sang kapulisan.
Ginpahayag ni Torre nga ang clearing sang highway nga gin- okupa sang naga-protesta nga mga members ang grupo ang kabahin sang security measures nga ila ginpatuman sa padayon nga pagpangita kay Quiboloy kag apat ka iban nga co-accused sa child abuse kag human trafficking charges.
