ILOILO CITY– Nagdugang sang pwersa ang kapulisan sa apat ka mga banwa sa Northern Iloilo bangud sa presensya sang mga Private Armed groups (PAG’s).
Ini ang ginalakipan sang banwa sang Lemery, Sara, Estancia kag Carles.
Suno kay Iloilo Police Provincial Office (IPPO) Director Police Col. Marlon Tayaba, sa nasambit nga mga banwa narekord ang mga insidente sang harrasment sa mga botante.
Pahayag pa ni Tayaba, lapnagon ang mga PAG’s sa nasambit nga mga banwa kun sa diin ginamandu-an ang mga ini sang mga pulitiko nga magpamakal sang boto kag magpamahog nga pamatyon ang mga botante nga indi maghatag sang suporta sa mga kandidato.
Nakig-angot na ang kapulisan sa Armed Forces of the Philippines (AFP) agud mapasigurado ang matawhay nga eleksyon.
Nagpanawagan man si Tayaba sa mga kandidato kag supporters nga magpabilin nga kalmado kag likawan ang anuman nga ginamo.
