ILOILO CITY – Kulang sa equipment ang Philippine National Police (PNP) rason nga indi mapatuman ang Republic Act 10586 ukon Anti-Drunk and Drugged Driving Act.
Sa interview sang Bombo Radyo kay Iloilo City Police Office (ICPO) Director Police Colonel Martin Defensor Jr., iya ginpahayag nga indi nila mapatuman sang husto ang nasambit nga layi bangud sa kakulang sang equipment.
Santo sa nakasaad sa layi, mahimo nga bawion ang linsensya sang traffic violator sa tion nga magpamalibad sa pagpaidalom sa aclohol kag chemicaltesting.
Ginpahayag ni Defensor nga naghingyo ang legal counsel ni June Paul Valencia, driver sang Mazda MX5 sports car, nga indi magpaidalom sa mandatory alcohol and chemical test ang iya kliyente.
Sa pagpaathag ni Defensor, kinamatarong man ni Valencia nga magpaiway sa aclohol kag drug test.
May kaangtanan sa kaso sang mga biktima nga sanday Alnie Dinah kag Joe Marie Osano, ginpahayag sang ICPO Director nga natigayon na ang case conference sa tunga sang pamilya kag sang otoridad.
Ginmandu-an na niya suno kay Defensor si Police Major Marlon Valencia, hepe sanga Mandurriao Police Station, nga ihanda na ang mga dokumento agud nga mapasaka na ang kaso batok kay June Paul Valencia.
Ginalauman suno sa natungdan nga subong nga adlaw, mapasaka na ang kaso sa fiscal’s office.
