Magaabot na subong nga adlaw sa Pilipinas ang bangkay sang pulis nga nalakip sa 67 nga napatay sang nagbungguanay ang eroplano kag army helicopter kag nahulog sa Potomac River sa Estados Unidos sang Amerika.
Si Col. Pergentino N. Malabed amo ang nagapungko nga supply management chief sang Philippine National Police (PNP) kag yara sa official duty sang natabo ang amo nga insidente.
Suno kay PNP Public Information Office (PIO) chief Col. Randulf Tuaño, sugataon ang bangkay ni Malabed sa Ninoy Aquino International Airport (Naia) para sa foyer honors subong nga adlaw kag dal-on sa Campo Crame kun sa diin patigayunon ang arrival honors, religious ceremony, kag public viewing.
Hatagan man ini sang Medalya ng Katapatan sa Paglilingkod kag Medalya ng Katangi-tanging Gawa.
Magluwas diri, may ihatag man ang kapulisan nga malapit P2.7-million sa pamilya ni Malabed halin sa PNP Savings and Loan Association, Inc.
May gin-set man nga necrological services sa Multi-Purpose Center sa Camp Crame. Igalubong naman ini sa Memorial Gardens sa Sta. Rosa City, Laguna sa Pebrero 27.
