Magapatigayon sang pre-charge investigation ang Philippine National Police sa mga team leaders sang Criminal Investigation and Detection Group (CIDG) nga nagserbe sang search warrant sa Tapaz, Capiz kag Calinog Iloilo sang Disyembre 30, 2020.
Sa exclusive interview sang Bombo Radyo kay Pol. Col. Roger James Brillantes, director sang Regional Internal Affairs Service (RIAS) 6, iya ginpahayag nga natapos na ang ila motu propio investigation ukon kaugalingon nga imbestigasyon sa natabo nga operasyon sa diin napatay ang siyam ka mga ginapatihan kahimbon sang rebelde nga grupo.
Suno kay Brillantes, nagpadala sila sang notice to file counter affidavit sa mga team leaders sang CIDG Regional Field Unit (RFU) 4A CALABARZON, CIDG Regional Field Unit National Capital Region kag PNP Drug Enforcement Group Special Operation Unit 11.
Yari ang mga pulis nga ginpadal-an sang notice:
Sa CIDG RFU 4A CALABARZON:
-PLT COL JOSEPH NANDU JR.;
-PMAJ CHARLIE MANG-OSA;
-PMAJ WARREN DILEM;
-PLT MELCHOR MUÑOZ;
-PLT EMMANUEL RABE; kag
-PLT ELBERT SANTOS
Sa PNP-DRUG ENFORCEMENT GROUP SPECIAL OPERATION UNIT 11:
-PEMS MEGIN BULANDRES; kag
-PSMS DAX BAYUTAS
Sa CIDG REGIONAL FIELD UNIT NCR:
-PLT COL REYSON BAGAIN;
-PMAJ DAVE ANTHONY CAPURCOS;
-PCPT MICHAEL NATHANIEL VISCO;
-PEMS JUAN FERNANDO;
-PSSg FERDINAND DANAO; kag
-PSSg GLICERIO ENCELA
Pebrero 19, Byernes, ang deadline nga ginhatag sang sa nasambit nga mga pulis sa pagpasa sang counter affidavits.
Ginpahayag ni Brilliantes nga apisar mapasa man ukon indi ang mga police respondents sang amo nga affidavit, magapatigayon sila sa gihapon sang pre-charge investigation agud matumod kun may probable cause ang pagserbe sang search warrant sa gintingob nga pwersa sang Philippine Army kag Philippine National Police nga ginpangunahan sang CIDG National Office.
Sa tion nga may makita nga probable cause, mahimo pasakaan sang kaso nga grave misconduct in violation to police operational procedure santo sa National Police Commission (NAPOLCOM) Memorandum Circular 2016-002 ang mga pulis.
