Padayon pa ang ginatipon ang mga ebidensya nga mahimo maangot sa person of interest sa kaso sa pagluthang-patay sa isa ka Indian national sa Barangay Guzman Jesena, Mandurriao, Iloilo City.
Ang biktima sa amo nga insidente nga natabo sang Hulyo 2 amo si Jatinder Singh, 29.
Sa interview sang Bombo Radyo kay Police Captain Val Cambel, hepe sang Mandurriao Police Station, iya ginpahayag nga ginahulat pa gihapon ang resulta sang ballistic examination halin sa Regional Forensic Unit nga kinahanglanon man sa imbestigasyon.
Nagapatigayon man ang kapulisan sang backtracking halin sa crime scene pakadto sa mga ginpangkadtuan sang Indian national antes ini gintiro sa iya gina-rentahan nga ilistaran sa Imperial 5 Subdivision sa Barangay Guzman-Jesena Streets, Mandurriao.
Lakip naman sa ginasundan sang mga pulis amo ang negosyo sini nga pautang kag ang impormasyon nga masami naga-eskandalo ang biktima kun mahubog.
Una na nga napahayag nga may record ini sa police station bangud pila ka beses ini nga na-preso bangud gina-reklamo ini sa “alarm and scandal” sa tion nga maka-inom.
Ginalantaw man sa imbestigasyon nga gun-for-hire ang yara sa likod sang asasinasyon apang padayon pa nga ginatumod ang identity sang mastermind.
Nahibaluan nga kaangay sa iban nga Indian nationals sa pungsod, involved si Singh sa lending business kag naga-operate ini sa syudad kag probinsya sang Iloilo.
