ILOILO CITY – May person of interest na ang Iloilo City Police Office sa asud-asud nga pagpang-ransack sa Iloilo Central Market.
Sang Abril 14, ang isa ka shoes and bags repair shop sa Iloilo Central Market ang ginkawatan.
Diri kag nadula ang cellphone kag laptop nga nabilin sa shop.
Sang Martes, Abril 18, liwat na naman nga ginkawatan ang Iloilo Central Market.
Diri kag ginsulod sang kawatan ang electric room sang merkado sa diin ginguba ang kandado.
Nakuha ang electric tools, gas stove kag branded nga relo.
Magluwas diri, ginkawatan man ang baligyaan sang ubod sa diin nakuha ang duha ka kutsilyo kag electric sander.
Sa interview sang Bombo Radyo kay Police Captain Peter John Ramos, officer-in-charge sang Iloilo City Police Station No. 1, iya ginpahayag nga may yara na sila sang ginadudahan nga amo ang sa likod sang pagpang-ransack.
Apang sa subong, indi pa nila mapagwa ang identity sini agud indi maapektuhan ang ila operasyon.
Agud indi na masulit pa ang kaangay nga insidente, nag-deploy na lang sila sang mga police personnel nga maga-duty sa nasambit nga merkado sa tion sang kagab-ihon.
Sa tion sang adlaw, may gina-deploy man sila nga mga pulis kag may patrol car man.
Magluwas diri, may ginpabantay man nga personnel ang Local Economic Enterprise Office (LEEO) sang Iloilo City Government agud mag-monitor sa nagakatabo sa merkado.
Nahibaluan nga wala sang closed circuit television (CCTV) sa merkado nga amo kuntani ang makabulig sang dako sa pagsolbar sa nagatabo nga pagpang-ransack.
