Padayon pa nga gina-imbestigaran sang mga pulis ang natabo sa Municipality of Sibuco sa Zamboanga Del Norte kun sa diin gin-kidnap ang American vlogger nga si Elliot Onil Eastman.
Suno kay Brig. Gen. Bowenn Joey Masauding, Police Regional Office 9 (PRO 9) director, may nahingadlan na nga persons of interest apang gina-verify pa ang report agud nga makumpirma ang ila involvement sa kilala nga “threat groups.”
“We are validating leads to ensure we are tracking the right group commander and we can build an airtight case,” suno kay Masauding. “We are working round the clock to locate the whereabouts of the victim and his abductors.”
Oktubre 17 sang natabo ang insidente kun sa diin apat ka mga armado nga lalaki nga nagpakilala nga pulis kag may dala nga M-16 rifles ang nagkuha sa biktima.
Gindala si Eastman sa naka-standby nga sakayan-pandagat kag ginaalegar nga natiruhan pa ini antes dalayon nga nakuha sang mga lalaki.
Naka-alerto naman ang Bangsamoro Autonomous Region in Muslim Mindanao (BARMM) police bangud ginaalegar nga pakadto sa dagat sang Sulu ukon Basilan ang mga suspek.
Ginatun-an ang impormasyon nga may kaangtanan ang Abu Sayyaf Group (ASG) sa kidnapping.
Si Eastman nga tumandok gid sang Hinesburg, Vermont, USA ang kilala sa iya “daily life” vlogs sa Zamboanga del Norte kag may linibo nga followers sa iya social media pages.
Kasado siya sa isa ka Pinay sa amo nga lugar kag binulan naman nga nagatinir sa amo nga komunidad antes ang insidente.
Sa isa ka statement, ginpahayag naman sang US embassy in Manila nga nagatrabaho ini kaupod sa mga otoridad sa kaso ni Eastman. Ginsiling man sini nga prayoridad gid sang US Department of State ang ikaayo kag safety sang American citizens nga nagapuyo sa luwas sang ila pungsod.#
