Nagpangayo sang pasensya ang Philippine National Police (PNP) kun may yara man sang na-“offend” matapos nagguwa ang picture nga magkaupod sanday dismissed Bamban, Tarlac Mayor Alice Guo, PNP chief Police General Rommel Marbil, kag Interior Secretary Benhur Abalos.
Kuha ang amo nga picture sa Jakarta, Indonesia kun sa diin napatung-an sang duha ka opisyal si Alice, nagayuhom sila nga tatlo, kag naka-peace sign pa ang dismissed mayor apisar nga sampaw-sampaw ang mga reklamo batok sa iya diri sa Pilipinas.
Suno kay PNP spokesperson Police Colonel Jean Fajardo, indi intensyon nanday Abalos kag Marbil nga maka-offend sa kay bisan sin-o.
“I’m sure SILG and Chief PNP ay aware naman po sa mga naririnig. There was no intention on their part to offend anyone,” pahayag ni Fajardo. “It’s normal for anyone siguro kapag kinukuhanan ng picture nag-i-smile naman but it does not necessarily follows that parang ang pinapalabas po, that are putting malice doon po sa pagpo-pose po ni Alice Guo with them on that picture.”
Una naman nga nagpaathag si Abalos nga para lamang sa documentation purposes ang pictures kag indi dapat pagmalisyahan.
Ginsiling sini nga nag-request si Guo nga mag-istorya sa ila bangud may death threat ini nga nabaton apang nagdugang ang tiglikom nga wala siya nakahibalo nga naga-peace sign na ini sa ila tupad.
Sa pihak nga bahin, ginmanduan man ni Justice Secretary Jesus Crispin Remulla ang agents sang Bureau of Immigration (BI) kag National Bureau of Investigation (NBI) nga magpaathag kasunod sang ila picture kaupod kay Guo sang ginsugat ini sa Indonesia.
Suno kay Department of Justice (DOJ) Assistant Secretary kag spokesperson Mico Clavano, ginsugo sang tiglikom ang pila ka opisyal nga magdagdag sang show cause order sa tanan nga yara sa laragway para mahatagan sila sang oportunidad nga masugid kun ano ang natabo kag ano ang ila rason.
“The Secretary has already instructed certain officials to give a show cause order to those that are involved in these pictures for them to be given a chance to explain,” pahayag ni Clavano.
Ginpasigurado man ni Clavano nga may due process nga ihatag sa mga ahente sa gobyerno.
“The explanations will be taken into consideration. Due process will be given to them, so it’s quite premature to say yet, no, kung ano ‘yung magiging hatol talaga dito sa behavior ng ating mga ahente,” dugang sini.
Nag-ugat ang isyu sang gin-ulan sang pagpakamalaot ang picture kun sa diin nakit-an si Guo nga all-smiles kag nagakapot pa sa butkon sang isa ka agent samtang yara sila sa isa ka salakyan kag pakadto na sa airport antes magpauli sa Pilipinas.
Madamo ang nagmuno nga daw magbarkadahay lang ang mga ini, naga-roadtrip, kag daw kaangay nga nahimo nga artista si Guo.
Suno kay Clavano, simple nga pagpabutyag lamang sang kalipay ang ginhimo sang agents bangud nakuha nila si Guo, apang nag-ako ini nga indi ini excuse agud nga i-post ang amo nga mga laragway.
1:10 kahapon sang kaagahon, Septyembre 6, sang ginbalik si Guo sa Pilipinas matapos nadakpan sa Tangerang City, Indonesia.#
