WESTERN VISAYAS – Nagapakig-angut na ang Philippine National Police sa mga local government unit kag iban nga ahensya sang gobyerno agud nga mahagan-hagan ang mga birth pains sang enhanced community quarantine.
Ini matapos nga may mag-amay nga nagpangawat sa isa ka balay sa Barangay Dayao , Roxas City sa diin gintayaan pa sang kutsilyo ang tag-iya sang balay kag nagpahayag ang lalaki nga wala sila sang iban nga tuyo kundi makuha lang sang pagkaon kag kwarta.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ginalaoman na sang kapulisan nga may matabo nga kinawatay kasunod sang Enhanced Community Quarantine bangud madamo sang trabante ang naapektuhan kag nadulaan sang palangabuhian.
Suno kay Malong, kuntani magserbe bilang “eye opener” sa local government unit ang natabo sa Roxas City sa diin nagakadapat nga nakahibalo ang mga LGU sang ila nagakadapat nga himuon.
Dugang pa sang natungdan, ang solusyon agud nga wala sang kinawatay nga matabo amo ang paghatag sang bastante nga pagkaon sa mga pumuluyo agud indi ang mga ini magutman.
