𝗜𝗟𝗢𝗜𝗟𝗢 𝗖𝗜𝗧𝗬 – Wala ginadula sang kapulisan ang posibilidad nga isa lang ang pusil nga ginhalinan sang duha ka stray bullet incident sa Villa San Lorenzo Subdivision, Barangay Loboc, Lapuz, Iloilo City kadungan sang New Year.
Ang una nga bala ang nakit-an sa sulod sang kwarto sang isa ka balay, samtang ang isa naman ka bala ang nakit-an sa kilid sang dalan.
Sa interview sang Bombo Radyo kay Police Captain Lester Oliveros, hepe sang Iloilo City Police Station 8, iya ginpahayag nga wala pa na natumod ang sa likod sang nasambit nga insidente.
Suno kay Oliveros, ginpadala naman nila ang bala sa Crime Laboratory agud matumod kun sa diin ini nga pusil naghalin.
Nagapanawagan man si Oliveros sa mga residente mga magpadulong sa kapulisan kun may idea ang mga ini nga nagpalupok sang pusil sang New Year.
