ILOILO – Nagdepensa ang Philippine National Police tuhoy sa ginahaboy sa ila nga isyu nga lunsay planted ang mga recoveries sa ginpatigayon nga pagserbe sang search warrant sa Tapaz, Capiz kag Calinog, Iloilo.
Sa exclusive interview sang Bombo Radyo kay Police Regional Office 6 Director PBGen. Rolando F. Miranda, iya ginpahayag nga lehitimo ang operasyon sang Criminal Investigation and Detection Group kaupod ang Philippine Army.
Suno kay Miranda, may ginakaptan nga search warrant ang mga police antes ang mga ini nagpadulong sa lugar sang ila mga subject.
Ginhangkat man ni Miranda ang mga nagakwestyon sa ila operasyon nga magpasaka sang kaso sa diin handa nila ini nga atubangon sa korte.
Nagpangindugan man ang natungdan nga ginsunod sang mga otoridad ang protocol sa pagserbe sang search warrant rason nga indi ini dapat pagkwestyunon.
Pasakaan naman sang kaso nga paglapas sa Republic Act 10591 ukon Comprehensive Firearms and Ammunition Regulation Act.
