ILOILO CITY – Nagdugang sang puwersa ang Police Regional Office 6 (PRO-6) sa puluy-an sang pamilya Demafelis sa Barangay Ferraris, Sara, Iloilo.
Kasunod ini sang ginapahayag pamahog sa kabuhi sang pamilya ni Joanna Daniela Demafiles, ang Ilongga OFW nga ginpatay sang iya mga amo sa Kuwait kag ginsulod pa sa freezer.
Sa interview sang Bombo Radyo Iloilo, ginpahayag ni PRO-6 director C/Supt. Cesar Hawthorne Binag nga gindugangan ang uniformed personnel sa puluy-an sang mga Demafelis magluwas pa sa regional mobile force.
Suno kay Binag, ang nakalab-ot sa ila amo ang ginapahayag plano nga pag-kidnap sa isa sa miyembro sang pamilya Demafelis.
Una na ginpahayag sa Bombo Radyo sang tiyo ni Joanna nga si Barangay Kagawad Pablo Demafelis nga may mga pamahog sa ila pamilya kag may mga makaduluda nga tawo nga nagapadulong sa ila lugar.
Nagapati ini nga ang kwarta nga bulig sang gobyerno sa pamilya Demafelis ang rason sang ginabaton nila nga pamahog.
Nahibaluan nga mismo ang Malacañang ang nagmando nga magpadala sang security team sa puluy-an sang mga Demafelis.