PNP naghimo na sang tikang vs pag-atake sang layaw nga mga ido sa 1 ka banwa sa Guimaras

ILOILO CITY – Ginatinguhaan sang mga pumuluyo kag mga opisyal sang Brgy. Tastasan, Buenavista, Guimaras nga matapna na ang pagpanghalit sang apat ka mga layaw nga ido nga nagapamatay sang mga hinuptanan nga sapat sa lugar.
Sa interview sang Bombo Radyo Iloilo kay Police S/Insp. Jeffrey Ferrer, hepe sang Buenavista PNP, ginpahayag sini nga may nagakaigo na sila nga koordinasyon sa mga barangay officials sang amo nga barangay kag nagabuligay sa pagronda sa lugar.
Ginakahangaw-an man nila nga posible mga bata na ang sunod nga biktimahon sang mga ido pananglitan maubos na pamatay ang mga kasapatan sa ila lugar.
Nahibaluan nga naglab-ot na sa 17 ka mga kanding, 22 ka mga pato kag duha ka tinday nga baka ang ginpatay na sang mga layaw nga ido sa lugar.