Nagtukod ang Philippine National Police (PNP) sang duha ka specialized committees — ang anti-kidnapping kag ang anti-fake news.
Ang Joint Anti-Kidnapping Committee (JAKAC) amo ang magatutok sa pag-identify, pag-imbestigar, kag pagdakop sa organisado nga kidnap-for-hire operations diri sa pungsod.
Gin-establisar ini kasunod sang pag-kidnap kag pagpatay sa Filipino-Chinese businessman nga si Anson Que kag iya driver nga siArmanie Pabillo. Tatlo ka mga suspek ang yara na sa kustodiya sang mga pulis, samtang ginalagas pa kun sin-o ang mastermind sa likod sang kidnapping kag murder.
Sa pihak nga bahin, ang Joint Anti-Fake News Action Committee (JAFNAC) amo naman ang ginalantaw nga magatapna sang misinformation kag disinformation.
Ginakabig ini sang awtoridad nga isa man ka moderno nga pamahog bangud mahimo sini maguba ang pagsalig sang publiko, ang kalinong sa komunidad, kag mangin ang pagka-estable sang pungsod.
Gintukod ini nga task force kasunod sang unverified reports nga nagalapta online kun sa diin ginaalegar nga may kidnappings sang prominente nga mga negosyante.
Tuyo sang committee nga makahimo sang coordination, monitoring, kag response strategies agud matapna ang sala nga mga impormasyon sa nagkalain-lain nga social media platforms.
“Fake news is not harmless—it can incite fear, panic, and even unrest. Under Bagong Pilipinas, we are taking a firm stand. WE will not allow deception to dictate the public narrative,” suno kay General Rommel Marbil, chief sang PNP. “These committees are not just organizational measures— they are proactive responses to modern-day threats. From kidnap-for-hire syndicates to digital disinformation campaigns, the PNP is moving decisively to protect our people.”
