Nagpaandam ang Philippine National Police (PNP) sa katapo sini nga kapulisan nga magpabilin nga ‘nonpartisan’ sa 2025 midterm elections.
Sa interview sang Bombo Radyo kay Police Lieutenant Colonel Arnel Solis, spokesperson sang Police Regional Office 6, iya ginpahayag nga naghatag na sang direktiba si Police Brigadier General Jack Wanky sa lower units nga tungdan sang maayo ang obligasyon kag magserbisyo nga wala sang may ginaapinan nga politiko ukon partido.
Suno kay Solis, kon may mga kapulisan nga paryente ukon kapamilya ang nagapadalagan nga politiko, ginasaylo ini kag ginadestino sa lain nga lugar.
Ginabalik naman ini gilayon sa iya katungdanan nga lugar kon matapos ang eleksyon.
Ginpahayag man sang natungdan nga isa ini ka tikang agud nga malikawan ang pagduda sa isa ka pulis nga naga-side ukon bias sa isa ka kandidato.
Gin-athag man ni Solis nga ginasigurado sang Police Regional Office 6 nga magapabilin sila nga nonpartisan eleksyon man ukon indi.
