Ginkumpirmar sang Philippine National Police nga nagpadala na sila sang intelligence kag tracker teams para kay Sarah Discaya nga tag-iya sang St. Timothy Construction, kag sa iban pa nga nadala sa ginatawag nga “ghost” flood control project sa Davao Occidental.
Suno kay PNP chief Jose Melencio Nartatez, Jr., naga-coordinate man ang pulisya sa iban nga ahensya sa pagpreparar sang warrant of arrest sa iban pa.
Ginpangabay sini ang publiko, labi na ang may direkta nga nahibaluan, nga makipag-angot agud masiguro ang transparency kag accountability sa paggamit sang pondo sang pungsod ilabi na sa mga proyekto nga ginapa-implementar sa ila mga lugar.
Antes sini, nagpasaka na ang Ombudsman sang kaso nga graft kag malversation batok kay Discaya, pila ka opisyal sang DPWH, kag iban pa, tungod sa P96.5-milyon nga “ghost” flood control project sa Davao Occidental.
Suno kay Ombudsman Jesus Crispin Remulla, yara si Discaya sa Pasig City kag yara sa idalom sang surveillance.
Samtang siyam naman sa 16 ka personalidad nga nadalahig sa anomalya sa Oriental Mindoro ang naaresto na, kag ginapaabot nga may madugang pa nga warrants of arrest sa masunod nga duha ka semana.
