Ginpasalig sang Police Regional Office VI nga bastante gihapon ang mga pulis sa Western Visayas nga magatapna sa nagkalain-lain nga mga krimen partikular na sa iligal nga droga.
Ini sa pihak sang anunsyo nga 20 tubtub 25 porsyento sang police force sa rehiyon ang igasaylo sa Negros Island Region ukon sa Region 18.
Katumbas ini sang masobra 13,000 ka police officers nga ma-assign na sa Negros Occidental Police Provincial Office kag sa Bacolod City Police Office sa idalom sang Police Regional Office – NIR.
Sa interview sang Bombo Radyo kay Police Colonel Arnel Solis, spokesperson sang Police Regional Office 6, iya ginpahayag nga wala ginakulang ang personnel sa Western Visayas bangud tuigan man ang recruitment kag ang central office man ang nagahatag sang numero kun pila ka bag-o nga patrolmen kag patrolwomen ang idugang sa rehiyon.
Magluwas diri suno sa iya, padayon ang trainings kag iban pa nga tikang para mapasanyog ang peace and order sa Western Visayas.
Gin-cite man sini ang maayo nga performance sang pulis sa rehiyon kun sa diin halin sang Hunyo 1-15, nagdangat sa 917 ang nadakpan nga mga indibidwal bangud sa illegal drugs, illegal gambling, loose firearms kag iban pa nga krimen.
Una na nga ginpahayag sang director sang Police Regional Office VI nga wala siya sang nakit-an nga problema kun isaylo ang iban nga personnel sa Negros Island Region bangud in place na suno sa iya ang provincial kag city police offices.
