ILOILO- Nakaalerto na ang Philippine National Police batok sa operasyon sang “bookies” kasunod sang pagsuspend ni Presidente Rodrigo Duterte sang mga gaming activities sang Philippine Charity Sweepstakes Office bangud sa isyu sang korapsyon sa ahensya.
Sa interview sang Bombo Radyo kay P/Brig. Gen. Rene Pamuspusan,director sang Police Regional Office 6, iya ginpahayag nga nagpagwa na ini sang direktiba tuhoy sa operasyon sang kapulisan batok sa bookies kag mga operators nga hingalitan ang pagpauntat sang mga hampang sang Philippine Charity Sweepstakes Office.
Suno kay Pamuspusan, ila tutukan ang pagtapna sa anuman nga sahi sang illegal gambling sa rehiyon.
Nagapati ang regional director nga isa ini ka tikang padulong sa pagpauntat sang korapsyon sa Philippine Charity Sweepstakes Office kag pagtapna sa bookies kag iban pa nga illegal gambling.
Nagpaandam man ang natungdan sa sin-o man nga maaktuhan nga nagapatigayon sang anuman nga sahi sang sugal nga pagadakpon ang mga ini kag pasakaan sang kaso nga illegal gambling.
Nagpangabay man ini sa publiko nga magbulig sa pagpalapnag sang nasambit nga mando sang presidente.
