ILOILO CITY – Nagsaka na sa 25 ang COVID-19 cases nga na record sa Police Regional Office 6 kun sa diin 24 ang Uniformed Personnel samtang isa naman ang Non-Uniformed Personnel.
Suno kay Police Lt. Col. Joem Malong, tagpamaba sang Police Regional Office 6, nga nalakip sa nagdugang sa listahan amo ang isa ka personnel nga na-assign sa Regional Personnel and Records Management Division.
Ang nasambit nga COVID-19 positive suno kay Malong ang residente sang Anilao, Iloilo kag sa subong, padayon ang contact tracing.
May kaangtanan diri, temporaryo nga siraduhon ang Regional Personnel and Records Management Division kag pagabuksan sa tion nga matapos na ang disinfection samtang ang tanan nga personnel ang ipaidalom sa quarantine kag sa COVID-19 test paagi sa swab sample.
Kadungan sini, ginkumpirma naman sang Iloilo City Police nga ginbawi-an sang kabuhi bangud sa COVID-19 si Police Executive Master Sergeant Angelito Parreño Jr. nga nagapaidalom sa Officers Candidate Course sa National Police Training Institute sa Laguna.
Santo sa report, si Parreño ang ginbawi-an sang kabuhi sa Calamba Medical Center.
As of August 20, 11 ka mga personnel ang naka-recover, 13 ang under quarantine kag isa ang patay.
