ILOILO CITY – Wala matago sang director sang Police Regional Office 6 (PRO-6) ang pagkadismaya matapos mag-record sang manubo nga accomplishment ang nagkalain-lain nga provincial police offices sa rehiyon.
Sa iya mensahe sa regular nga flag raising ceremony, liwat ginmanduan ni Chief Supt. Jose Gentiles ang mga pulis nga pasangkaron pa kag indi pagpabuyan-buyanan ang kampanya batok sa iligal nga droga.
Nahibaluan nga base sa record sang Regional Oversight Committee, naglab-ot lang sa 79 ka mga drug personalities ang nadakpan umpisa nga liwat ginbuhi ang Project Oplan Double Barrel Reloaded.
Pagkatapos sang flag ceremony, gilayon nagpatawag si Gentiles sang meeting kaupod ang iya Directorial Staff kag mga provincial police offices agud maplastar ang plano sa liwat nga pag-pick up sang kampanya batok sa illegal drugs.
Suno kay Gentiles, tinguhaan sang Police Regional Office 6 nga malab-ot ang accomplishment nila antes pa man ginpauntat kag ginbalik ang pagpangdakop sang mga may kaangtanan sa iligal nga droga.
Ginpahayag ni Gentiles nga antes pa man ginpauntat ang Oplan Tokhang, nagalab-ot sa 207 ka mga personalidad ang ila natigayon nga madakpan sa isa ka bulan ukon kabug-usan nga 1,450 ka mga naaresto sa bilog nga Rehiyon 6.