ILOILO CITY – Ginpaandaman sang otoridad ang publiko sa ginakabig ‘fake news’ kaangot sa gina-alegar kidnapping kag abduction sa Brgy. San Isidro, Jaro, Iloilo.
Suno kay Police Captain Eduardo Siacon, hepe sang Jaro Police Station, nagapadayon ang imbestigasyon sang kapulisan kaangot sa nasambit nga kaso apang wala sang kamatuoran ang ginalapta nga text message nga may nagluntad nga ginpuwersa nga pagkuha sang tatlo ka babayi sa amo nga barangay.
Suno kay Siacon, wala sang report nga nabaton ang estasyon.
Kaangot diri, una naman nga nagpaandam ang Philippine National Police (PNP) sa mga netizens nga nagapalapta sang sala nga balita nga may nagakatabo nga serye sang kidnapping sa sa Metro Manila kag ginaalegar nga ginabaligya ang bahin sang ila mga lawas.
Ginpahayag ni PNP Spokesperson Brig. Gen. Bernard Banac nga apisar may mga kopya sang closed circuit television (CCTV) nga nagapakita nga may ginpwersa nga pagkuha sa mga kabataan, indi pa matumod kon bala matuod ang mga ini — kag kon san-o kag diin ini natabo.
Indi man beripikado ang mga video sang mga kabataan nga ginkuhaan sang ila mga internal organs.
Gindugang sang otoridad nga ini nga mga video ang nagtuga sang kahadlok sa publiko, kag nagalapas sa Cybercrime Prevention Act of 2012 bangud sa pagpalapta sang fake news.
Dugang sang kapulisan, mas maayo kon indi anay pag-ipakigbahin sa social media ang amo nga mga posts.
