ILOILO – Madugay na nga nagapangita sang paagi ang Sangguniang Panlalawigan agud mabuligan ang 601st Regional Mobile Force Battalion nga wala sang kaugalingon nga salakyan nga ginagamit sa mga operasyon.
Sa interview sang Bombo Radyo kay Board Member Rolly Distura, iya ginpahayag nga nakahimo na siya sang mga resolution bangud personal gid niya nga nahibaluan nga ginakulang sang equipment ang kapulisan kag nagapanghulam pa kun kaisa sa Local Government Unit (LGU) agud lamang makakadto sa ila mga operasyon kag importante nga hilikuton.
Suno pa kay Distura, lakip sa iya ginpadal-an sang sulat amo si Cabinet Secretary Atty. Raul Lambino, administrator sang Cagayan Economic Zone Authority (CEZA), bangud may yara sang mga kumpiskado nga mga salakyan sa Cagayan port nga ginapanghatag na lang sa LGUs.
Tubtob subong suno sa natungdan, wala pa sang sabat nga nahatag si Sec. Lambino.
Dugang pa, naghingyo man ang Sangguniang Panlalawigan sang units sa Philippine National Police (PNP) national headquarters kag ginlauman nga mabaton kuntani ini pagkatapos sang Southeast Asian Games (SEAGames) sang nagligad nga tuig.
Magluwas sa kakulang sang salakyan, talalupangdon man suno kay Distura ang driver nga amo ang nagadala sa PNP vehicle.
Suno sa natungdan, sa iya malawig nga termino bilang alkalde, nakit-an niya nga bisan sin-o lang nga pulis ang ginapamaneho sang jeepney-patrol.
Dugang pa, ginpahayag man ni Distura nga indi lang dapat pag-purchase sang salakyan ang hatagan sang pagtamod sang kapulisan kundi ang pagpakaayo sini sa tion nga maguba.
Pahayag sang opisyal, nagareplika man sa gihapon sa imahe sang kapulisan ang itsura sang salakyan nga ila ginagamit.
Bangud sini nga mga kakulangan, nagpasalig ang natungdan nga indi mag-untat ang Iloilo Provincial Government sa pagpadala sang mga resolution agud mabuligan ang PNP sa probinsya sang ila mga kinahanglanon.
