Nagpaandam ang Philippine National Police (PNP) sa bag-o nga sahi sang barato lang nga iligal nga droga nga ginahimo kag ginapalapta diri sa Pilipinas.
Suno kay PNP Drug Enforcement Group (PDEG) director Brig. Gen. Eleazar Matta, nadiskubrehan nila ini sa isa ka buybust operation sa Pasay City kun sa diin isa ka 26-anyos nga Chinese national ang nadakpan.
Nakuha sa iya ang ketamine, shabu, amphetamine, ecstasy, kag assorted party drugs nga nagabalor sang P7.69-million.
Ginatawag nga methyl amphetamine ang bag-o nga substance kag daw kaangay lamang sa shabu apang liquid ang porma kag may mas manubo nga neurotoxic effect.
Daw ordinaryo nga tubig lang kun lantawon suno sa natungdan apang gina-proseso ini kag posible himuon bisan sa sulod sang condominium.
“The liquid substance can also be converted into a solid one. It also crystalizes. You would think it’s ordinary distilled water but when it is processed, it still causes a lot of effects in the air and produces odor,” suno kay Matta sa isa ka press briefing sa Camp Crame, Quezon City, Agusto 30.
Ini nga bag-o nga sahi sang iligal nga droga ang ginabaligya sa social media platforms kag kabahin na sang hugot nga ginabantayan sang kapulisan.
Apisar sini, nagpasalig si Matta nga nag-level up man ang mga pulis sa ila mga lihok agud nga matapna ini nga illegal drug trade.
“Our regional police offices have substantial yield in terms of arrest of individuals and confiscation of illegal drugs so your government especially is not letting our guard down in stopping these illegal drugs fueling or entering our country,” pahayag sini.
Magluwas sa pag-monitor diri, ang ginatutukan subong sang PDEG amo ang reports nga may local officials nga may kahilabtanan sa distribusyon sang iligal nga droga sa komunidad bilang isa ka paagi agud makatipon sang pondo para sa 2025 midterm elections.##
