Wala pa sang request nga ginpadala ang kapulisan sa Iloilo City Council agud magpatuman sang signal jamming sa Dinagyang Festival 2025.
Sa interview sang Bombo Radyo kay Iloilo Councilor Sedfrey Cabaluna, Chairman sang Committee on Public Safety, iya ginpahayag nga kon ‘signal jamming’ posible pa sila nga magpasugot ang council apang kon ‘signal shutdown’ mahimo nga madamo sang maapektohan rason nga sang nagligad nga Dinagyang, wala sang signal jamming/shutdown nga ginpatuman.
Suno kay Cabaluna, tubtob subong, wala sa gihapon sang proposal sa nasambit nga mga tikang.
Ginpahayag man sini masami Disyembre nagapadala sang sulat ang Philippine National Police (PNP) agud madiskusyonan ini sang temprano.
Nagalaum man ang natungdan nga kon may pasilidad na ang kapulisan nga mag-signal jamming, mahimo ini nga mapahanugotan, apang kon wala lang man kag shutdown ang matabo, posible nga magaagi ini anay sa madamo nga rekisitos.
Nahibaluan nga sang nagligad nga tuig, wala na ginpatuman ang signal jamming/shutdown bangud sa mga disbentaha nga natuga sini sang 2022.
