ILOILO CITY-Gindula sang Philippine Nuclear Research Institute-Department of Science and Technology (PNRI-DOST) ang kahangawa sang publiko sa tion nga madayon ang pag-revive sang Bataan Nuclear Power Plant (BNPP).
Sa interview sang Bombo Radyo kay Dr. Carlo Arcilla, director sang Philippine Nuclear Research Institute-Department of Science and Technology (PNRI-DOST), iya ginpahayag nga mapag-on sa gihapon ang istruktura sang amo nga planta apisar nga masobra apat ka dekada na ini nga wala ginagamit.
Suno kay Arcilla, indi man magtanyag ang South Korea sang $1 billion agud i-rehabilitate ang planta kun wala sila sang salig sang integridad sang power plant.
Dugang pa niya, kinahanglan man nga panumduman sang maayo sang gobyerno ang proposal sang Seoul bangud sa ila kredibilidad sa rason nga
kalabanan sang nuclear power plants sang South Korea ang pareho lang ang edad sa BNPP kag ila nabawi ang construction expenses sa sulod lang sang anom ka tuig.
Ginpasiguro man sang PNRI director nga sa tion nga maghatag ang gobyerno sang green light agud mag- operate ang BNPP, magasunod ini sa international standards kag magapaidalom sa maid-id nga inspection agud makalikaw sa posible pagluntad sang nuclear disasters.
Suno pa kay Arcilla,ang BNPP sarang lang nga mag-generate sang masobra sa 600 megawatts sang kuryente kag indi ini bastante gani kinahanglan nga suguran ang paggamit sang nuclear energy bangud nga malapit na lang maubusan sang gas ang main sources sang fuel sang pungsod nga amo ang Malampaya field.
Ang tanyag sang South Korea kasunod man sang pag-isyu ni Presidente Rodrigo Duterte sang Executive Order 164 nga naga-establisar sang nuclear energy program agud mag- expand sang power sources ang pungsod.
