Ginlimitahan na sang mayoriya sang Iloilo City Council ang legislative functions ni Vice Mayor Lady Julie Grace Baronda matapos ginpasar ang resolusyon nga naga-adoptar sang Department of the Interior and Local Government (DILG) Opinion No. 95, series of 2025, sa Internal Rules of Procedure (IRP) sang konseho nga may vote nga 13-1.
Ang amo nga resolusyon ang ginduso ni Councilor Romel Duron kun sa diin ginpasulod sa internal rules sang Sangguniang Panlungsod ang interpretasyon sang DILG tuhoy sa papel kag awtoridad sang bise alkalde sa legislative body.
Sa idalom sang amo nga opinyon, ang panguna nga papel sang bise alkalde amo ang pag-preside sa mga session sang konseho kag paghatag sang deciding vote kon may tabla nga boto.
Nag-agi sa debate sa session ang 24 ka pages nga committee report sang Committee on Rules antes ini gin-adoptar sang mayoriya kag ginpasar ang resolusyon.
Sa nangin boto nga 13-1, si Councilor Sheen Marie Mabilog, nga kabahin sang minority bloc kag kaalyado ni Baronda, amo lamang ang nagkontra sa resolusyon.
Sa tion sang deliberasyon, nag-manifest si Councilor Sheen Marie Mabilog kag ginpamangkot ang proponent kon nagapati ini nga may ginahimo nga ilegal ang mga vice mayor kag vice governor sa probinsya sang Iloilo kon nagapasar sila sang mga resolusyon ukon ordinansa.
Ginpahayag man sini nga kaangay nangin selective ang panindugang sa konseho kag kaangay nga ginsudlan na sang pampulitika.
Ginpabutyag man ni Mabilog ang iya kabalaka nga mahimo maghatag sang impresyon nga lain ang pagsulundan nga ginapatuman sa Iloilo City kumpara sa iban nga lokal nga panguluhan sa probinsya.
Wala naman direkta nga ginsabat ni Councilor Duron ang mga nangin pamangkut ni Councilor Mabilog rason nga nagtuga ini sang ila pagsabtanay nga ginpatung-an man ni Vice Mayor Baronda.
