Luyag imbitaron ni Sen. Sherwin Gatchalian ang ginaalegar nga big boss sang POGO nga si Lin Xunhan, alias Boss Boga, sa masunod kag posible pinakaulihi nga hearing sang Senado sa Philippine Offshore Gaming Operators.
Ginhingyo ni Gatchalian sa Senate Committee on Women, Children, Family Relations and Gender Equality nga imbitaron si Lin.
Matandaan nga gin-aresto sang Presidential Anti-Organized Crime Commission (PAOCC) kag Bureau of Immigration (BI) si Lin sang Oktubre 10.
Nagapati si Gatchalian nga konektado ang mga big boss sa mga POGO hubs gani luyag niya mahibaluan nga kun ano pa ang mga POGO hubs nga konektado kay Lin.
Suno sa senador, ginatinguhaan man nila nga makapakig-angot kay She Zhijiang, ang self-confessed Chinese spy nga nagsiling nga si dismissed Bamban, Tarlac Mayor Alice Guo ang kaangay man niya nga agent.
Si She ang napreso subong sa Thailand.
