Gin-report sang Presidential Anti-Organized Crime Commission (PAOCC) nga nagtinguha nga magbiya sa Pilipinas ang iban nga mga sindikato nga amo ang ginadudahan nga nagapadalagan sang iligal nga mga aktibidad sang Philippine Offshore Gaming Operators (POGOs).
Ini kasunod sang raid nga ginpatigayon sang otoridad sa Bamban, Tarlac kag sa Porac, Pampanga kun sa diin may wala-tuo nga mga ebidensya nga nakit-an sa mga krimen nga ginapanghimo sa compound.
Magluwas pa ini sa kasagsagan man sang kaso ni Bamban, Tarlac Mayor Alice Guo nga ginatudlo man nga involved sa Pogo operation kag napamatud-an na nga ang iya identity ang nagasanto sa Chinese national nga Guo Hua Ping nga nagsulod sa Pilipinas sa edad nga 13-anyos.
Suno kay PAOCC spokesperson Winston Casio, nakabaton sila sang impormasyon nga ini nga foreign syndicates ang nagtilaw nga makapalagyo via Puerto Princesa, Davao, Zamboanga, kag Cebu.
Pahayag ni Casio sang nag-atubang ini sa hearing sang Senado, tanan nga mga boss sang grupo ang wala sang gina-uyatan nga valid passports.
Isa diri si Zhang Jie nga nagauyat sang majority nga 40% sang shares sa Lucky South 99 POGO sa Porac nga malusot kuntani sa Davao sang Domingo, Hunyo 23, apang na-intercept sang Immigration bangud sa isyu sa visa.
Tuyo kuntani ni Zhang, 30, nga makasakay sa flight sa Davao International Airport (DIA) kag magpauli sa Jinjiang, China.
Nahibaluan nga mahimo lamang ma-monitor sang PAOCC ang movements kag ma-intercept ang flights sang mga foreign syndicates nga wala sang passports, apang ang may passports kag wala sang issues ang mahimo makaguwa sa pungsod kun wala sang Hold Departure Order (HDO) nga i-isyu ang korte.
Sa pihak nga bahin, ang Bureau of Immigration (BI) ang may gahum naman sang pag-isyu sang Immigration Lookout Bulletin Order (ILBO) para kay Guo kag 17 ka iban pa nga involved sa Porac, Pampanga, kag Bamban, Tarlac POGOs. Ang ILBO amo lamang ang high-alert mechanism para sa otoridad apang indi man sini mapunggan ang tawo nga may valid passport nga makaguwa sa Pilipinas.
