Nanindugan ang Philippine Amusement and Gaming Corporation (PAGCOR) nga indi kinahanglan nga dumilian ang Philippine offshore gaming operators (POGO) kundi pabaskugon lamang ang anti-crime operations batok sa ginasuspetsahan nga alien hackers, scammers, kag cyber-criminals.
Suno kay PAGCOR Chairman and CEO Alejandro Tengco, ini nga mga kriminal ang masami nagapanago sa buildings kag compounds nga mataas ang seguridad.
“We do not need to outlaw POGOs; what we need to do is intensify anti-crime operations against suspected alien hackers, against scammers and cyber-criminals who are usually hiding in highly secured buildings and compounds,” kabahin sang statement.
Nagapati siya nga ini nga mga sindikato ang wala naga-engage sa offshore gaming, kag kun involved gid man, iligal nila ini nga ginahimo.
Indi nagakadapat suno sa iya nga ipaulan na lamang ang tanan nga basol sa lisensyado nga gaming operators bangud ang mga ini ang hugot man nga gina-monitor sang PAGCOR.
“We should not blame and demonize our licensed gaming operators because these are closely monitored by PAGCOR,” suno kay Tengco.
Ginsiling sini nga may monitoring teams sila sa tanan nga areas sang licensed gaming operators para masigurado ang ila compliance sa terms sang mga lisensya.
Sang nagligad nga semana sang gin-conduct na naman sang otoridad ang isa ka raid sa POGO hub sa Porac, Pampanga kun sa diin may nakit-an nga bundles sang cash, assorted jewelry, kag ginadudahan nga illegal drugs sa pito ka buildings. Naka-rescue man ang Presidential Anti-Organized Crime Commission (PAOCC) sang gina-alegar nga torture victim kag sang Sabado, nakitaan sang ginaalegar nga torture devices ang amo nga POGO hub.
