ILOILO CITY – Nagpanagtag sang iodine tablets ang Poland sa mga regional fire departments agud nga may ihatag sa mga pumuluyo sa tion sang radioactive exposure kasunod sang inaway malapit sa Zaporizhzhia nuclear power plant nga sakop pa sang Ukraine.
Ang iodine ang ginakabig nga isa ka pamaagi agud nga maproteksyunan ang lawas batuk sa mga kondisyon kaangay sang thyroid cancer.
Ang inaway malapit sa pinakadako nga power plant sa Europa nga nagresulta sa pagkaguba sang mga building kag pagsirado sang anum ka reactors kag pag-utod sang mga power cables ang ginakahangaw-an nga magatuga sang nuclear catastrophe nga maga-apekto sa kaiping nga mga pungsod.
Suno kay deputy interior minister Blazej Pobozy, ini ang nangin tikang sang gobyerno sang Poland matapos nga naglupok ang balita kag ginpaathag sa mga residente nga ang ini nga pre-emptive actions ang para sa seguridad sang tanan.
Ang pamahog ni President Vladimir Putin nga maggamit sang nuclear weapon ang nagtuga sang kakulba sa mga residente kag mangin ang mga Russian ang nagdinaguso na nga maggwa sa pungsod.
Siyam ka missiles ang ginlunsyar sang Russia sa syudad sang Zaporizhzhia nga nag-igo sa isa ka hotel kag sa isa ka power station.
Ang Zaporizhzhia ang ginabanta nga yara sa kalayuon nga 50 km halin sa nuclear plant.
Ang pinuno sang United Nations atomic agency ang nagpahayag nga nagaplano sila nga maghimo sang protection zone sa palibot sang Zaporizhzhia plant apisar sang plano sang Russia nga mag-mobilize sang bag-o nga mga tropa kag maga-hold sang referendum.
