ILOILO – Madugay na nga police asset nga nagabulig sa kampanya batok sa iligal nga droga ang pulis nga naluthangan-patay sa Barangay Abilay Sur, Oton, Iloilo.
Ang biktima amo si Police Corporal Felfrance Lumahang, isa ka non-commissioned officer.
Sa interview sang Bombo Radyo kay Police Colonel Gilbert Gorero, director sang Iloilo Police Provincial Office (IPPO), iya ginpahayag nga nagahimo sang follow-up operation si Lumahang para sa buy bust operation sa San Rafael, Mandurriao.
Nagpamalibad si Gorero sa pagdetalye nahanungod sa amo nga buybust operation bangud padayon pa subong ang operasyon sang mga pulis agud maaresto ang subject.
Base sa nauna na nga impormasyon, posible nga namutikan sang suspect nga police asset ang iya gina-istorya sa transakyon sa illegal drugs rason nga ginluthang na lang ini.
Ginaimbestigaran pa sang otoridad kun antes ang insidente, may yara na nga daan sang death threats nga nabaton ang biktima bangud suno kay Gorero, mapisan si Lumahang kag nagasunod pirme sa mga drug buy bust operations.
Nagpalab-ot man sang simpatiya si Gorero sa pamilya sang nagtaliwan nga pulis kag nagpasalig nga magahatag sang assistance.
