Gin-relieve bilang Officer-in-Charge sang Pavia Municipal Police Station si Police Captain Ritz Field Presquito.
Base sa kumpirmasyon sang Iloilo Police Provincial Office (IPPO), ginapangitaan pa subong kun sa diin ini ibutang kag natalana man ini nga magpaidalom sa schooling.
Ang nagtal-os naman sa iya amo si Police Major Bryan Alamo nga amo anay ang nangin hepe sang Pototan Municipal Police Station antes ini na-assign sa headquarters sang IPPO.
Epektibo ang relief order sang nagligad pa nga Mayo 19.
Sa interview sang Bombo Radyo kay PLt. Col. Arnel Solis, spokesperson sang IPPO, iya ginpahayag nga kinahanglan nga Police Major ang ranggo sang magapungko sa Pavia Police gani nga ginbulos si Alamo nga available na subong.
Ginklaro ni Solis nga wala ini sang kaangtanan sa nangin performance ni Presquito bangud maayo man suno sa iya ang pag-uyat sini sang mga kaso kag sitwasyon sa Pavia kag nangin madasig kag ma-id-id man ini sa imbestigasyon.
Lakip sa mga nangin kaso nga natabo sa Pavia nga gin-imbestigaran sa idalom ni Presquito amo ang pagpang-ransak sa GT Mall Pavia sang tinalikdan nga Disyembre 17, 2025 kun sa diin masobra P30 million nga balor sang alahas kag P280,000 nga cash ang ginkawat sa Pawnshop and Jewelry Store samtang P580,000 nga cash naman ang nakawat sa money changer.
Sang Abril 14 naman, natabo ang pagtiro-patay sa plant manager sang isa ka kilala nga cake shop sa diin pilason man ang upod sini nga HR officer sa Barangay Ungka 1, Pavia.
Sang Abril 29 naman, napuhag ang bilog nga Pavia kag gintutukan sang Iloilo ang kaso sang pagkasapo sang sunog nga bangkay sang Green Meadows Subdivision sa Ungka I, Pavia nga sang ulihi nakumpirma nga amo ang 22-anyos nga graduating nursing student nga si Frank Rois Barbasa.#
