ILOILO — Posible nga masuspendi sang 90 ka adlaw ukon tatlo ka bulan si Police Corporal Ryan Barbosa, anay desk officer sang San Enrique Municipal Police Station bangud sang neglect of duty.
Ini kasunod sang paglapta sang video nga madugay nga nagpanawag si Alyas Kiko sa sagwa sang nasambit nga istasyon agud magreklamo kuntani nga ginhurikap ini sang isa ka myembro sang LGBT sa ila nga public plaza apang wala sang taho ang amo nga police station.
Sa interview sang Bombo Radyo kay Police Brigadier General Jack Wanky, Regional Director sang Police Regional Office 6, iya ginpahayag nga nagapadayon pa ang imbestigasyon sa pito ka mga pulis nga imbolbado, nga amo sanday:
Police Captain Airel Dawn Parcon
Police Senior Master Surgent Joan B Matutino
Police Staff Sergeant Ma. Ella B Cachuela
Police Staff Sergeant Jivelyn P Parcon
Police Staff Sergeant Dyan Rey G Parcon
PCp| Jofit L Helican
Police Corporal Laurence P Sionosa
Police Corporal Ryan E Barbosa
Lakip naman sa mga ginapadalman sang imbestigasyon amo ang pagpadulong sang duha ka pulis sa puluy-an ni Alyas Kiko sa Miag-ao kun sa diin, ginpilit nila si Kiko nga magpirma sang affidavit kag mag-issue sang public apology.
Suno kay Wanky sa inisyal nga imbestigasyon, nagagwa nga dako ang salabton diri ni Police Corporal Ryan Barbosa nga amo ang desk officer sa amo nga tinion bangud ginbayaan sini ang iya pwesto samtang wala pa ang iya reliever.
Pahayag pa ni Wanky nga madala man sa liability ang anay hepe nga si Police Capt. Parcon sa command responsibility kag ginalantaw pa kun ano ang mangin liability sang iban pa nga kapulisan sa San Enrique Municipal Police Station.
