Nakaguwa na sa Pilipinas ang isa ka police general nga natalana kuntani nga arestuhon bangud sa ginaalegar nga involvement sa mishandling sang P6.7-billion drug case.
Suno kay Philippine National Police (PNP) spokesperson Brig Gen. Jean Fajardo, ini nga general ang nakabiya na sa Pilipinas sang Enero 8 ukon antes pa man nagguwa ang arrest warrant.
Nakasentro ini nga kaso kay dismissed Police Master Sergeant Rodolfo Mayo Jr. nga nadakpan kadungan man sang pagkumpiskar sang mga otoridad sang 990 kilograms sang suspected shabu nga may estimated value nga masobra P6.7 billion sa drug operations sa Manila sang 2022.
Si Mayo ang nakaserbe anay nga intelligence officer sang PNP Drug Enforcement Group.
Nangin mas kontrobersyal ang amo nga kaso bangud sa gin-alegar nga tuyo sang mga police officers nga luwason kag tabun-tabunan pa ang sala ni Mayo.
Lakip sa ginkasuhan sang piskalya amo ang 30 ka aktibo kag anay mga pulis lakip ang duha ka ranking police generals bangud sa paglapas sa Comprehensive Dangerous Drugs Act of 2002. Sa 30 nga ginkasuhan, 29 ang may arrest warrants.
20 ang yara na sa kustodiya sang pulis, kag siyam na lang ang at large lakip na ang absent nga police general. Magluwas sa iya, ang walo nga iban pa nga ginapangita amo ang apat ka aktibo nga pulis, tatlo ka retired personnel, isa nga nag-resign, kag isa nga nasipa man sa serbisyo.
