ILOILO CITY – Ginakompleto na lang sang Iloilo Police Provincial Office (IPPO) ang mga papeles agud mangin mapag-on ang kaso nga ipasaka batok sa katapo sang New People’s Army (NPA) nga nagpang-atake sa Maasin Municipal Police Station.
Suno kay PCI Aron Palomo, taghambal sang IPPO, nagapakig-angot naman sila sa Regional Intelligence Division sang Police Regional Office 6 agud nga makilala ang mga katapo sang NPA nga nagsulod sa Maasin Police Station.
Pahayag sini, may yara naman sila sang iban nga nakilala santo man sa nakuha sa CCTV, apang ang iban nga indi pa makilala ang pagabutangan lang anay sang John Doe kag Jane Doe sa tion nga ipasaka ang kaso.
Madumduman nga sa amo nga pagpang-atake sang NPA, nakuha ang 11 ka mga M16 armalite rifles, apat ka mga .9mm pistols, mga alahas, laptop kag kwarta sang mga police sa Maasin Police Station.