ILOILO CITY – Gin-relieve na bilang director sang Iloilo City Police Office si Police Colonel Leo Batiles.
Ang pag-relieve kay Batiles ang natabo pila ka oras matapos ang ginpatigayon nga operasyon sang Regional Police Drug Enforcement Unit VI sa Barangay Bakhaw, Mandurriao kun sa diin, 32 ang na-aresto.
Si Batiles ang buslan ni Police Colonel Joeresty Coronica nga amo ang head sang Regional Personnel and Records Management Division.
Siya ang ipaidalom sa non-duty status samtang nagahulat sang iya retirement sa Mayo.
Si Coronica ang buslan naman ni former Capiz Police Provincial Office Director Police Colonel Wilson de Belen.
Sa interview sang Bombo Radyo kay Police Regional Office VI director Police Brigadier General Leo Francisco, iya ginpahayag nga nadesisyunan nila ni Iloilo City Mayor Jerry Treñas nga i-relieve na sa pwesto si Batiles bangud kinahanglan na kag agud nga makahanda ini para sa iya pagretiro.
Dugang pa niya, nangin malinong naman ang syudad sang Iloilo sa idalom ni Batiles ilabi na ang ginpatigayon nga face-to-face Dinagyang Festival.
Samtang, sa mangin bag-o nga pamunuan sang Iloilo City Police Office sa idalom ni Coronica, nagalaum si Francisco nga tumanon sini ang ginalauman sa iya sang alkalde sang syudad.
Lakip sa ginalauman sa ila amo nga pabaskugon pa ang kampanya batuk sa iligal nga droga.
Subong nga adlaw, patigayunon ang turnover of command ceremony sa Iloilo City Police Office.
