ILOILO CITY -Ginakabig nga dako nga bugal ni Philippine National Police (PNP) deputy chief for operations Police Liutenant General Camilo Cascolan matapos isa sa mga ginakonsiderar nga mangin masunod nga PNP Chief.
Ini bangud magaretiro na si PNP Chief Police General Oscar Albayalde sa maabot nga Nobyembre.
Sa interview sang Bombo Radyo kay Cascolan, iya ginpahayag nga mabudlay nga magsalig nga siya ang pilion nga mangin masunod nga pinuno sang PNP.
Suno kay Cascolan, makabig pa nga premature ang pag istorya sa nasambit nga topiko apang nalipay man ini bangud nalakip ang pangalan sini nga magsunod sa tapak ni Albayalde.
Magluwas kay Cascolan, lakip sa ginapilian amo sanday P/Lt. Gen, Archie Gamboa, kag NCRPO chief Police Major General Guillermo Eleazar.
Una na nga ginpahayag ni Albayalde nga ang ginabasehan niya sa mangin masunod nga PNP Chief amo ang seniority kag performance sang mga nasambit nga opisyal sang pulis.
Nahibaluan nga si Gamboa kag Cascolan ang classmates ukon ‘mistah’ ni anay PNP Chief Ronald Dela Rosa kag ni Albayalde sa Philippine Military Academy (PMA) kag kabahin sang Sinagtala Class of 1986, samtang si Eleazar naman ang miyembro sang Hinirang class of 1987.
Si Cascolan ang sadto anay nagpungko bilang Deputy Director for Administartion sang Police Regional Office (PRO) 6.
