POTOTAN, ILOILO – Wala gid naglaum si Police Major Ronnie Brillo, hepe sang Pototan Municipal Police Station, nga may yara sang naga-inom nga pulis sa sulod sang vicinity sang nasambit nga police station sa Pototan, Iloilo.
Ini ang kasunod sang pagkadakop sa aktu sang inspection team kanday Patrolman Joerick Ace Ilisan kag Police Corporal Esil Peñarubia nga naga-inom sa sulod sang vicinity sang nasambit nga police station.
Sa interview sang Bombo Radyo kay Brillo, iya ginpahayag nga sang natabo ang insidente, yara siya sa hamyang ni Police Staff Sergeant Jessie Pamado sa Brgy. Lumbo sa nasambit man nga banwa.
Suno kay Brillo, bangud nga wala ang deputy chief of police sang amo nga tion, may yara siya sang gintulinan nga senior police officer nga amo ang in-charge sa police station.
Ginpahayag ni Brillo nga nakabaton lamang siya sang tawag gikan kay Police Major Nash Canja nga amo ang team leader sang inspection team nga may yara sang naga-inom nga duha ka pulis sa sulod sang vicinity sang police station.
Sang naka-abot na siya sa police station suno kay Brillo, didto kag iya nga ginsaway ang duha ka pulis apang sa baylo nga magpati, ginhangkat pa siya ni Ilisan sang away.
Bangud nga hubog ang duha ka pulis, wala niya ginsapak si Ilisan kag iya nga ginsugo ang iban nga pulis nga sawayon kag pauntaton sa pag-inom sanday Ilisan kag Peñarubia.
Suno sa hepe, nagbunot sang iya service firearm si Ilisan kag ginsinggitan siya nga mag-away sila nga duha.
Bangud sini, nagpangayo siya gilayon sang bulig sa Special Weapons and Tactics sang Iloilo Police Provincial Office.
