ILOILO CITY – Hugot nga ginpanginwala sang akusado nga police major ang kaangtanan sini sa pagkadula sang Miss Grand Philippines candidate nga si Catherine Camilon.
Suno kay Police Colonel Jacinto Malinao, Jr., regional chief sang Criminal Investigation and Detection Group 4-A, sa ginpatigayon nga interview sessions kay Police Major Allan de Castro, lunsay general denial ang nakuha nila kag naga-duty siya sang amo nga tion.
Pahayag niya, sang naggwa ang issue, ginpasabat man si Castro sang provincial director sang Batangas nga iya man nga ginpanginwala.
Apang ginpahayag ni Malinao nga wala sila nagapati kag nagapadayon ang ila imbestigasyon ilabi pa nga wala nakit-an sa subong ang lawas ni Catherine.
Si Castro ang na-assign sang una sa Batangas bilang deputy sang drug enforcement unit.
Base sa nakuha nga pahayag sang kapulisan, si Catherine kag si Castro ang may relasyon.
Ini ang ginkumpirma mismo sang utod sang beauty queen kag sang abyan niya nga isa man ka beauty queen.
Dugang pa ni Malinao, sang nagligad, ginsakit ni Castro si Catherine.
Ginkumpirma man sang natungdan nga ang ginasundan nila nga kritikal nga motibo sini amo nga nagpanugid si Catherine sa asawa ni Castro nga nagapangbabayi ini.
Base sa text messages, si Castro ang tabu-on ni Catherine sang adlaw nga nadula ini.
Si Police Major Allan de Castro nga nagapang-edaron sang 40 ang graduate sang Philippine National Police Academy Class of 2008 kag may duha ka mga anak.
Sa subong, nagapabilin ini sa restricted custody.
Sang nagligad nga adlaw, ginpasakaan ini sang kaso lakip na ang tatlo ka iban pa.
