Napasaka na ang panumbungon nga kidnapping kag illegal detention batok sa apat ka mga suspek nga ginaangot sa kaso sang pagka-missing sang beauty queen nga si Catherine Camilon nga amo ang tiglawas sang Tuy, Batangas sa Miss Grand Philippines 2023.
Suno sa Philippine National Police (PNP), ang mga nagapangatubang sang complaints amo sanday Police Maj. Allan Avena de Castro, ang iya nga personal driver kag bodyguard nga si Jeffrey Magpantay, kag may yara sang duha ka John Does ukon indi pa matumod ang identity.
Gina-preparar man sang Regional Field Unit 4A sang Criminal Investigation and Detection Group (CIDG) ang dugang nga mga dokumento agud mapabaskog pa ang kaso nga gin-file.
Oktubre 12 pa sang na-report nga missing si Camilon kag tubtub subong, wala nahibaluan kun sa diin ini kag indi man maathag kun buhi pa.
Pahayag pa ni Police Major General Romeo Caramat Jr., director sang CIDG, may impormasyon nga ang police major kuntani ang tabuon ni Camilon sang adlaw nga indi na ini makontak sang iya pamilya.
Ginpahayag nga ka-relasyon sang beauty queen ang amo nga pulis kag may impormasyon man suno sa otoridad nga tuyo na kuntani sini nga makig-break sang amo nga adlaw.
“Allegedly, before nawala si Miss Camilon ay siya ‘yung tatagpuin niya. Gusto nang makipaghiwalay kay Maj. Allan de Castro at maybe this is one of the reasons siguro bakit nag-away sila,” suno kay Caramat.
Ginalantaw sang mga pulis nga may “love angle” sa sini nga kaso.
Napaidalom ang police officer sa restrictive custody sa headquarters sang Police Regional Office 4A.
Sa pihak nga bahin, ginkumpirma man sang PNP nga may nakit-an nga posible nga blood samples kag buhok halin sa Sports Utility Vehicle (SUV) nga gina-angot man sa pagkadula ni Camilon.
Nakit-an ang amo nga salakyan sa Barangay Dumuclay, Batangas City matapos ginpahayag gin-abandonar na halin pa sang nagligad nga Huwebes. Gindala na ang amo nga salakyan sa Batangas Provincial Police Office agud ipaidalom sa forensic tests kag ginalauman nga makabulig sa imbestigasyon.
Magluwas nga beauty queen, isa ka public school teacher si Camilon sa Tuy, Batangas kag ulihi nga nakit-an nga buhi sa isa ka shopping mall sa Lemery sa amo nga probinsya sang Oktubre 12, ‘las syete sa gab-i.
Ginsiling sini sa iya iloy nga magakadto siya sa Batangas City para sa meeting sa Balisong Channel, isa ka online media company kun sa diin nagpungko siya anay bilang talent. Apang nagpaguwa sang statement ang Balisong Channel nga wala nakakadto sa ila opisina si Camilon kag ulihi ini nga nakabisita sa ila sang Disyembre 13, 2021.#
