Patay ang isa ka police personnel nga assigned sa Iloilo Provincial Police Office (IPPO) kasunod sang shooting incident sa Barangay Cuartero, Jaro, Iloilo City.
Ang biktima amo si Police Senior Master Sergeant Stephen Aguilar, kasado kag may duha ka kabataan.
Sa interview sang Bombo Radyo kay alyas Jun, kasilingan sang biktima, iya ginpahayag nga kaagahon na sang nakabati sila sang isa ka mahinay nga lupok sang armas-luthang.
Suno kay Jun, nakit-an nalang nila nga may mga pulis na nga nagresponde sa balay ni Aguilar.
Nahibaluan nga nag-angkon ang biktima sang igo sa ulo nga amo ang gintunaan sang iya kamatayon.
”POSIBLE NAG-SUICIDE”
Nakalab-ot ang impormasyon sa pila ka mga barangay official sang Cuartero, Jaro, Iloilo City, nga nag-inaway pa ang pulis nga si Aguilar kag ang iya asawa ginabanta las 6:00 sang aga antes natabo ang shooting incident.
Sa interview sang Bombo Radyo kay Punong Barangay Marieta Orleans, iya ginpahayag nga ginalantaw nga posible nag-suicide ang biktima.
Apang santo sa ila pagpangusisa, wala pa sang impormasyon nagikan sa mga otoridad kun sin-o ang nagpalupok sang armas-luthang kag kun ano ang matuod nga natabo.
Pahayag sang opisyal, residente sang Barangay Calubihan, Jaro, Iloilo City ang biktima kag didto man ginapahayag ginpaistar ang duha sini ka kabataan.
Madugay naman suno sa iya nga nagarenta sang balay sa ila lugar si Aguilar kaupod ang asawa sini.
”NAGAPADAYON PA ANG IMBESTIGASYON”
Nagapadayon ang imbestigasyon sang Jaro Police Sation angot sa shooting incident sa Barangay Cuartero, Jaro, Iloilo City.
Sa interview sang Bombo Radyo kay Police Lt. Wence Alcober, Deputy for Operations sang Jaro Police Station, iya ginpahayag nga gindala pa ang biktima sa ospital apang gindeklara nga dead on arrival.
Suno kay Alcober, indi pa nila matumod ang posible nga anggulo sa shooting incident.
Narekober naman ang isa ka slug kag basiyo sang ginapahayag 9mm nga pistol sa diin ginapa-imbestigaran man kun ini nga armas-luthang ang ginapanag-iyahan sang biktima.
Pahayag sang pulis, ginahulat man nila nga makapakig-angot sa ila kag makahatag sang pahayag ang asawa ni Aguilar.
