ILOILO CITY– Wala naplanuhan sang maayo ang extraction sang Regional Mobile Force Battalion 6 nga nagresulta sa vehicular accident sa Brgy. Ginomoy, Alimodian, Iloilo sa diin apat ka pulis ang napatay.
Sa interview sang Bombo Radyo kay Police Regional Office 6 Director Police Brigadier General Rene Pamuspusan, iya ginpahayag nga sa iya pagtan-aw, wala naplanuhan sang maayo ang nasambit nga operation bangud wala nakahibalo ang batallion commander sang husto nga numero sang mga pulis nga nagpatigayun sang minor operation.
Suno kay Pamuspusan, luyag niya mahibaluan sa kun nga-a nagtingob sa pagsakay sa isa lang ka salakyan ang 30 ka mga pulis kag kun nga-a naghulam pa sila sang salakyan sa Local Government Unit sa Alimodian apisar nga may yara man sila sang Troop Carrier.
Tuman nga nagakasubo ang bug-os nga Police Regional Office 6 sa natabo nga aksidente nga nag-utas sang kabuhi sang apat kag pagkapilas sang 26 ka mga pulis.
Nagakadapat suno kay Pamuspusan nga ang pagplano sang operation ang nahibalu-an sang tanan nga personnel kag indi lang limitado sa mga opisyal.
Bilang commander suno kay Pamuspusan, dapat hibaluon kun paano ang pagpatigayun sang combat operation humalin sa numero sang mga personnel, target, adlaw sang operation kag ang extraction sang tropa.
Ang combat operation suno sa natungdan ang isa ka tactical operation kag wala na nagakinahanglan nga mismo ang regional director pa ang magplano.
