ILOILO CITY– Gina-obra lang sang katapo sang Philippine National Police ang ila trabaho para sa peace and order sa Western Visayas kag wala sila nagalagas sang data ukon accomplishment.
Ini ang may kaangtanan man sa nangin achievements ni Police Regional Office 6 director Police Brigadier General Rene Pamuspusan.
Sa interview sang Bombo Radyo kay Police Colonel Joem Malong, spokesperson sang Police Regional Office 6, iya ginpahayag nga consolidated na ang mga data sang ginpatigayun nga operasyon sang kapulisan sa bug-os nga Western Visayas.
Suno kay Malong, sa bahin sang mga most wanted persons, ang mga nagkaladakpan ang kabahin sang top 10 sa mga munisipalidad, Iloilo Police Provincial Office kag sa bahin sang Regional Office.
Dugang pa sang natungdan, sa tanan nga mga Regional Offices sa bug-os nga pungsod ang Police Regional Office 6 gid lamang ang may kampanya kontra sa mga loose firearms.
Nahibaluan nga sa halos isa ka bulan nga pagpungko ni Pamuspusan nakapatigayun sang 180 ka anti drug operations sa diin 250 ang arestado samtang duha ang patay.
Nakakumpiska man sang 65.60 grams sang marijuana nga nagabalor sang P49,202.93 kag sa bahin sang shabu nakakuha ang halos 1,549.15 grams nga nagabalor sang P23,180,583.
Sa pag-aresto sang mga wanted persons may yara sang 313 ang arestado sa diin 18 sa mga ini ang most wanted persons.
Sa kampanya kontra sa iligal nga sugal may yara sang 81 ka mga operations, 212 ang arestado kag nakumpiska ang halos P57,001.00.
Sa tokhang kontra ginadumilian nga pusil sa soft hand approach may yara sang 98 ka armas nga ginsurrender, samtang 199 ang deposited, samtang sa iron hand approach 14 ang ginserbihan sang search warrant.
May yara naman sang 70 ka mga focused police operations nga ginpatigayun.
Sa Illegal fishing may 46 ka mga operasyon nga ginpatigayun, 200 ang arestado, 100 kgs sang isda ang nakumpiska kag 53 ka mga sakayan ang ginkustodiya sang mga otoridad.
Sa illegal logging naman, may 15 ka mga operasyon nga ginpatigayun sa diin 13 ang arestado.
